Banie Swanepoel –
Die priesters was net uit die stam van Levi en uit dieselfde geslag:
Esra 6: 18 En hulle het die priesters aangestel volgens hulle afdelings en die Leviete volgens hulle afdelings vir die diens van God in Jerusalem, volgens die voorskrif van die boek van Moses.
Levítikus 6: 22 Ook moet die priester wat uit sy seuns in sy plek gesalf word, dit berei, as ‘n ewige insetting. Dit moet geheel en al vir die HERE aan die brand gesteek word.
Levítikus 6: 32 En die priester wat gesalf en aangestel sal word om in die plek van sy vader die priesteramp te bedien, moet die versoening doen; en hy moet die linne klere, die heilige klere, aantrek
Dis sonde om iemand aan te stel as priester wat nie uit Levi was nie:
1 Konings 12: 30 En hierdie saak het tot sonde geword; ja, die volk het voor die een gaan aanbid tot by Dan. 31 Hy het ook tempels van die hoogtes gebou en priesters aangestel uit al die dele van die volk wat nie uit die seuns van Levi was nie.
Vader veroordeel as mense sy woorde nie gehoorsaam nie.
Levítikus 10: 1 En die seuns van Aäron, Nadab en Abíhu, het elkeen sy vuurpan geneem en vuur daarin gegooi en reukwerk daarop gesit en vreemde vuur voor die aangesig van die HERE gebring, wat Hy hulle nie beveel het nie. 2 Daarop het daar vuur van die aangesig van die HERE uitgegaan en hulle verteer, en hulle het gesterwe voor die aangesig van die HERE.
Volgens die Bybel is Yahshua ook Hoëpriester.
Hebreërs 3: 1 Daarom, heilige broeders, deelgenote van die hemelse roeping, let op die Apostel en Hoëpriester van ons belydenis, Christus Jesus,
Hebreërs 4: 14 Terwyl ons dan ‘n groot Hoëpriester het wat deur die hemele deurgegaan het, naamlik Jesus, die Seun van God, laat ons die belydenis vashou.
Is Hy ‘n onwettige Hoëpriester omdat Hy nie uit Levi is nie?
Hebreërs 7: 14 Want dit is volkome duidelik dat onse Here uit Juda voortgespruit het, en met betrekking tot hierdie stam het Moses niks gesê van die priesterskap nie.
Daar is net twee moontlikhede:
- Yahshua breek die wet van Moses deur ‘n priester te wees uit die stam van Juda
- Yahshua is nie priester onder die wet van Moses nie
Yahshua is priester volgens die orde van Melgisédek en nie volgens die orde van Aäron nie.
Hebreërs 7: 17 Want Hy getuig: U is priester vir ewig volgens die orde van Melgisédek.
Die gesag van die priesters:
Deuteronómium 21: 5 Dan moet die priesters, die seuns van Levi, aankom; want die HERE jou God het hulle uitverkies om Hom te dien en om in die Naam van die HERE te seën, en volgens hulle uitspraak moet elke saak van twis en verwonding afgehandel word.
Wat is die orde van Aäron en wat is die orde van Melgisédek?
Die doel van die wet van Moses was om die orde van Aäron te handhaaf. Dit beteken dat die kinders van Israel die wet van Moses gehou het en dan ordelik daarvolgens geleef het om te bereik wat die verbond verwag het. Hierdie orde was bewerk deur die diens van die priesters volgens die orde van Aäron. Volgens die orde van Aäron mag hierdie priesters net aangestel word uit die stam van Levi.
Nou verskyn Yahshua op die toneel as priester, maar Hy is uit die geslag van Juda en nie uit Levi nie. Die orde volgens Aäron maak Hom dus ‘n onwettige priester. Ons weet egter dat Hy nie ‘n onwettige priester is nie, omdat Hy nie priester is volgens die orde van Aäron nie, maar volgens die orde van Melgisédek.
Melgisédek is nie Aäron nie, en Aäron is nie Melgisédek nie. Aäron was die broer van Moses uit die stam van Levi en Melgisédek het geleef voor die kinders van Israel, reeds in die tyd van Abraham.
Wie was Melgisédek dan?
Génesis 14: 18 En Melgisédek, die koning van Salem, wat ‘n priester van God, die Allerhoogste, was, het brood en wyn gebring 19 en hom geseën en gesê: Geseënd is Abram deur God, die Allerhoogste, die Skepper van hemel en aarde. 20 En geseënd is God, die Allerhoogste, wat u vyande in u hand gegee het. Toe gee hy hom die tiende van alles.
Hebreërs 7: 1 Want hierdie Melgisédek was koning van Salem, priester van God, die Allerhoogste, wat vir Abraham tegemoetgegaan het by sy terugkeer toe hy die konings verslaan het, en hom geseën het; 2 aan wie Abraham ook ‘n tiende deel van alles gegee het—hy was in die eerste plek, volgens uitleg, koning van die geregtigheid en dan ook koning van Salem, dit is koning van vrede; 3 sonder vader, sonder moeder, sonder geslagsregister, sonder begin van dae of lewenseinde, maar gelykgestel aan die Seun van God, bly hy priester altyddeur. 4 Let nou op hoe groot hierdie man was, aan wie selfs Abraham, die aartsvader, ‘n tiende van die buit gegee het. 5 Nou het hulle wat uit die seuns van Levi die priesterskap ontvang, wel ‘n gebod om, volgens die wet, van die volk tiendes te neem, dit is van hulle broers, ofskoon hulle uit die lendene van Abraham voortgekom het; 6 maar hy wat nie uit húlle sy geslagsregister aflei nie, het van Abraham tiendes geneem en die besitter van die beloftes geseën. 7 Nou word sonder enige teëspraak die mindere deur die meerdere geseën. 8 En hier neem wel sterflike mense tiendes, maar dáár een van wie getuig word dat hy lewe. 9 En, om so te sê, het ook Levi wat tiendes ontvang, deur Abraham tiendes gegee; 10 want hy was nog in die lendene van sy vader toe Melgisédek hom tegemoetgegaan het.
Yahshua is dus Priester volgens die orde van Melgisédek en nie Aäron nie. Melgisédek en Aäron het elkeen sy eie orde, wet en Hoëpriester. Yahshua was nie Hoëpriester volgens die orde en wet van Aäron nie.
Hebreërs 7: 12 Want met verandering van die priesterskap kom daar noodsaaklik ook verandering van wet;
Hoekom is dit noodsaaklik dat daar ‘n ander wet moet wees, as die wet van Moses, volgens die orde van Aäron?
As dit nie ‘n ander wet as die wet van Moses is nie sal die wet van Moses volgens die orde van Aäron Yahshua veroordeel as ‘n onwettige priester omdat Hy nie uit die stam van Levi is nie. Yahshua sal ‘n wetverbreker wees.
Hoekom was dit nodig vir ‘n nuwe priester orde volgens Melgisédek en kan ons nie nog onder die orde van Aäron wees nie?
Hebreërs 7: 20 En vir sover dit nie sonder eed swering was nie—want húlle het sonder eed swering priesters geword, 21 maar Hy met eed swering deur die Een wat aan Hom gesê het: Die Here het gesweer en dit sal Hom nie berou nie: U is priester vir ewig volgens die orde van Melgisédek— 22 in sover het Jesus van ‘n beter verbond borg geword. 23 En hulle het wel priesters geword in ‘n groot aantal, omdat hulle deur die dood verhinder is om aan te bly; 24 maar Hy, omdat Hy vir ewig bly, besit ‘n priesterskap wat nie op ander oorgaan nie. 25 Daarom kan Hy ook volkome red die wat deur Hom tot God gaan, omdat Hy altyd leef om vir hulle in te tree. 26 Want so ‘n hoëpriester was vir ons gepas, een wat heilig, onskuldig, onbesmet, afgeskeie van die sondaars is, en wat hoër as die hemele geword het; 27 wat nie elke dag nodig het, soos die hoëpriesters, om eers vir sy eie sondes offers te bring en dan vir dié van die volk nie. Want dit het Hy net een maal gedoen toe Hy Homself geoffer het. 28 Want die wet stel as hoëpriesters aan mense met swakhede, maar die woord van die eed swering wat ná die wet gekom het, stel die Seun aan, wat vir ewig volmaak is.
As die orde van Aäron ons nie kan red nie, maar die orde van Melgisédek kan wel, wat is die waarde van die orde van Aäron en sy meegaande wet vandag as die orde van Melgisédek sy eie wet het?
Hebreërs 7: 12 Want met verandering van die priesterskap kom daar noodsaaklik ook verandering van wet;
Hebreërs 8: 1 Die hoofsaak nou van wat ons gesê het, is dít: Ons het so ‘n Hoëpriester wat gaan sit het aan die regterhand van die troon van die Majesteit in die hemele, 2 ‘n Bedienaar van die heilige dinge en van die ware tabernakel wat die Here opgerig het en nie ‘n mens nie. 3 Want elke hoëpriester word aangestel om gawes en offers te bring. Daarom moes Hy ook iets hê om te offer. 4 Want as Hy op aarde was, sou Hy selfs geen priester wees nie, omdat daar priesters is wat volgens die wet die gawes offer, 5 hulle wat ‘n afbeeldsel en skaduwee van die hemelse dinge bedien, soos Moses ‘n goddelike bevel ontvang het toe hy die tabernakel sou voltooi; want Hy het gesê: Kyk dat jy alles maak volgens die voorbeeld wat jou op die berg getoon is. 6 Maar nou het Hy ‘n voortrefliker bediening verkry vir sover Hy ook Middelaar is van ‘n beter verbond wat op beter beloftes wettelik gegrond is. 7 Want as daardie eerste een onberispelik was, sou daar nie plek vir ‘n tweede gesoek word nie. 8 Want Hy berispe hulle en sê: Kyk, daar kom dae, spreek die Here, dat Ek met die huis van Israel en die huis van Juda ‘n nuwe verbond tot stand sal bring, 9 nie volgens die verbond wat Ek met hulle vaders gemaak het op die dag toe Ek hulle aan die hand geneem het om hulle uit Egipteland uit te lei nie; want hulle het nie gebly by my verbond nie, en Ek het hulle veronagsaam, spreek die Here. 10 Want dit is die verbond wat Ek ná dié dae sal sluit met die huis van Israel, spreek die Here: Ek sal my wette in hulle verstand gee en dit op hulle hart skrywe; en Ek sal vir hulle ‘n God wees, en hulle sal vir My ‘n volk wees. 11 En hulle sal nie meer elkeen sy naaste en elkeen sy broer leer en sê: Ken die Here nie; want almal sal My ken, klein en groot onder hulle. 12 Want Ek sal barmhartig wees oor hulle ongeregtighede en aan hulle sondes en hulle oortredinge nooit meer dink nie. 13 As Hy sê ‘n nuwe verbond, het Hy die eerste oud gemaak; en wat oud word en verouder, is naby die verdwyning.
Waarom kan ons ons nie onder die orde van Aäron skaar en die wet van Moses hou nie?
Yahshua is ons verlosser en het in ons plek vir ons gesterf en ons sonde op Hom geneem. Hy is nie Priester volgens die orde van Aäron nie en kan ons nie red as ons onder die orde van Aäron wil leef nie.
Galásiërs 3: 22 Maar die Skrif het alles ingesluit onder die sonde, sodat die belofte uit die geloof in Jesus Christus aan die gelowiges gegee kon word. 23 Maar voordat die geloof gekom het, is ons onder die wet in bewaring gehou, ingesluit met die oog op die geloof wat geopenbaar sou word. 24 Die wet was dus ons tugmeester na Christus toe, sodat ons geregverdig kan word uit die geloof. 25 Maar nou dat die geloof gekom het, is ons nie meer onder ‘n tugmeester nie.
As ons wil leef volgens die wet van Moses onder die orde van Aäron is ons verplig om die hele wet te hou en nie net die wette wat ons kies nie, want as ons in een wet struikel is ons skuldig aan die hele wet. Die wet het geen genade nie, maar straf altyd alle wetsoortredinge met die dood.
Yahshua het die wet vervul en nie ontbind nie.
Matthéüs 5: 17 Moenie dink dat Ek gekom het om die wet of die profete te ontbind nie. Ek het nie gekom om te ontbind nie, maar om te vervul. 18 Want voorwaar Ek sê vir julle, voordat die hemel en die aarde verbygaan, sal nie een jota of een titteltjie van die wet ooit verbygaan totdat alles gebeur het nie.
Wanneer ons in Hom sterf is ons dood vir die wet en die wet vir ons en dit is die enigste manier om onder die oordeel van die wet uit te kom, omdat ons nie die hele wet kan hou nie. Omdat die wet nie ontbind is nie veroordeel die wet nog steeds almal wat onder die wet is en nie vrygekom het deur in Yahshua te sterf nie.
Romeine 6: 3 Of weet julle nie dat ons almal wat in Christus Jesus gedoop is, in sy dood gedoop is nie? 4 Ons is dus saam met Hom begrawe deur die doop in die dood, sodat net soos Christus uit die dode opgewek is deur die heerlikheid van die Vader, ons ook so in ‘n nuwe lewe kan wandel. 5 Want as ons met Hom saamgegroei het deur die geleikvormigheid aan sy dood, sal ons dit tog ook wees deur dié aan sy opstanding; 6 aangesien ons dit weet dat ons oue mens saam gekruisig is, sodat die liggaam van die sonde tot niet gemaak sou word en ons nie meer die sonde sou dien nie. 7 Want hy wat gesterf het, is geregverdig van die sonde.
Galàsiërs 2: 18 Want as ek weer opbou wat ek afgebreek het, dan betoon ek myself ‘n oortreder; 19 want deur die wet is ek vir die wet dood om vir God te lewe. 20 Ek is met Christus gekruisig, en ék leef nie meer nie, maar Christus leef in my. En wat ek nou in die vlees lewe, leef ek deur die geloof in die Seun van God wat my liefgehad het en Homself vir my oorgegee het. 21 Ek verwerp nie die genade van God nie; want as daar geregtigheid deur die wet is, dan het Christus tevergeefs gesterwe.
Romeine 7: 1 Of weet julle nie, broeders want ek spreek met mense wat die wet ken dat die wet oor die mens heers so lank as hy lewe nie? 2 Want die getroude vrou is deur die wet aan die lewende man gebonde; maar as die man sterwe, is sy ontslae van die wet van die man. 3 Daarom dan, as sy ‘n ander man s’n word terwyl haar man lewe, sal sy ‘n egbreekster genoem word; maar as die man sterwe, is sy vry van die wet, sodat sy nie ‘n egbreekster is as sy ‘n ander man s’n word nie. 4 So, my broeders, is julle dan ook ten opsigte van die wet dood deur die liggaam van Christus, om aan ‘n ander te behoort, naamlik aan Hom wat uit die dode opgewek is, sodat ons tot eer van God vrugte kan dra. 5 Want toe ons in die vlees was, het die sondige hartstogte wat deur die wet kom, in ons lede gewerk om vir die dood vrugte te dra. 6 Maar nou is ons ontslae van die wet waardeur ons gebonde was, aangesien ons dit afgesterf het, sodat ons dien in die nuwigheid van die Gees en nie in die oudheid van die letter nie.
Beteken dit dat ons nou wetteloos is en dat ons kan doen wat ons wil?
Nee, ons is nie sonder wet nie, maar onder die wet volgens die orde van Melgisédek en nie die wet volgens die wet van Aäron nie. Die wet van Aäron is met letters op klippe gegraveer en die wet van Yahshua is op ons harte gegee deur die Heilige Gees. Die mense onder die wet van Moses was gelei deur die wet op klippe gegraveer en die mense onder die wet van Yahshua word gelei deur die Gees van God. Vir die natuurlike mens maak die wet op klippe baie sin en is die wet op ons hart dwaasheid en daarom verwerp hulle die nuwe verbond, maar daarmee saam verwerp hulle ook hulle eie verlossing
Galàsiërs 5:14 Want die hele wet word vervul in een woord, naamlik: Jy moet jou naaste liefhê soos jouself. (Dit sê nie die volheid van die nuwe wet is jy moet jou naaste liefhê soos jouself nie, maar dit sê dat die wet van Moses vervul was deur die liefde tot die naaste. Die wet van Yahshua bevat dus dit en meer.) 15 Maar as julle mekaar byt en opeet, pas op dat julle nie die een deur die ander verteer word nie. 16 Maar ek sê: Wandel deur die Gees, dan sal julle nooit die begeerlikheid van die vlees volbring nie; 17 want die vlees begeer teen die Gees, en die Gees teen die vlees; en hulle staan teenoor mekaar, sodat julle nie kan doen wat julle wil nie. 18 Maar as julle deur die Gees gelei word, dan is julle nie onder die wet nie. 19 En die werke van die vlees is openbaar, naamlik owerspel, hoerery, onreinheid, ongebondenheid; 20 afgodery, towery, vyandskap, twis, jaloersheid, toornigheid, naywer, tweedrag, partyskap; 21 afguns, moord, dronkenskap, brassery en dergelike dinge, waarvan ek julle vooraf sê, soos ek al vroeër gesê het, dat die wat sulke dinge doen, die koninkryk van God nie sal beërwe nie. 22 Maar die vrug van die Gees is liefde, blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing. 23 Teen sulke dinge is die wet nie. 24 Maar die wat aan Christus behoort, het die vlees met sy hartstogte en begeerlikhede gekruisig. 25 As ons deur die Gees lewe, laat ons ook deur die Gees wandel.
DAAR STAAN ÓÓK GESKRYWE